Wie Sjarel Olivier in 1972 Prins woort vaan carnavalsvereineging de Mosasaurussen en heer inkele daog en aovende mèt de manslui op stap góng, waors veur häöm de maot vol. Heer zag “Hiere, dit kin neet langer zoe. Veer op stap en de vrouwlui thoes. Iech höb nog rolle vitraasj op de mansard ligke en dao make veer get pekskes vaan , heudsje op en v’r neume hun daan de Mooswiever vaan St. Pieter. En heer spaok dao-bij oet de historiese wäörd: es v’r de vrouwlui bij us höbbe, kinne v’r noets te laat thoes koume”!

De pekskes en heudsjes zien in de loup vaan de jaore deks gewisseld en veranderd. En toch perbere um in dizze moderne tied ’n bitteke de kleiaasj vaan vreuger neet oet ’t oug te verlere. En ouch de naom weurt nog welins gesleuteld. Mooswiever voonte de lui e bitteke ordinair klinke. Daorum weurt ouch dekser gesproke euver de “Moosweifkes”. En de Opper Mosasaurus vaan noe sprik mèt väöl respect euver de “Meidskes vaan de Moos en de Poor”.

Dit groet Mooswiefbeeldsje woort op 19 fibberwarie 2019 oetgereik
aon de aoftreiend president vaan de Thomas More Studiekringk,
Jos de Bruijn