Wat höbbe Math Boelen, Philip Houben, Maria van der Hoeven en Marino Mahovic mèt mekaar te maken? Op ziech weineg. Toch brachte de legendarische hospes, de geleefde aajd-börgervaajer vaan Mestreech, de minister vaan Economische Zakes en de opper-moeljaan vaan c.v. de Mosasaurussen zoondagmiddag de glazer umhoeg ter gelegenheid vaan de heropening vaan de ambassaad vaan de Vrijheid Sint Pieter, in kaffee Tapperij De Poshoorn in Wyck.
Ambassaad? Vaan de Vrijheid Sint Pieter? In Wyck noch wèl? Boe geit dit euver? Vraoge genog. ’T Sjoene vaan aw Mestreechse gebruuke, rituele en verhaole is tot de antwoorde in de weie en naobije historie kinne weure gevoonde.
In dit geval goon v’r wied trök in d’n tied. D’n Heilege Lambertus had oets op Sint Pieter ‘nne villa mèt ‘immuniteit’, dee in bezit kaom vaan ‘t bisdom vaan Luik. Zoe kraog Sint Pieter de naom ‘Luikse Vrijheid’. Op 14 juli 1470 besloot Karel de Stoute dat de Vrijheid Sint Pieter oonder ‘t gezag vaan Mestreechs-Luikse schepene zouw valle.
‘Nne sprunk in d’n tied: 16 juni 2002. Oonder auspiciën vaan carnavalsvereneging De Mosasaurussen (Sint Pieter) woort de ‘ambassaad vaan de Vrijheid Sint Pieter’ officieel in gebruuk genome. Oppe Helmstraot, boe d’n hospes Math Boelen door börgemeister Houben woort beneump tot ambassadeur. ‘T ein en aander woort vastgelag in ‘n door Gérard Felix oontworpe glaas-in-loed-raom.
De käös waors neet veur niks op Math gevalle. Veurtot heer nao de Helmstraot vertrok, had Math naomelek de kaffee vaan ‘Tila’ aon de Pieterskade euvergenome en umgeduip tot Cantina Mexico. Boelen: “In de geis vaan de awwere waors dat d’n iertse jäögkaffee. Dat heet 17 jaor gedoort.”
Meh zoe es zoe miejer zakes goon, Math haolde zien pensioen in de Helmstraot en ‘t ambassaad-raom raakte besjaodeg. Zoe kaom ‘t tot de officiële vertegewoordeging vaan de ‘Vrijheid Sint Pieter’ gistere mèt ‘t nudege ceremonieel mos weure heropend. Al is dat daan ouch op ‘t territoir vaan De Kemeleers in Wyck. Dit kin noch zjus. Hier of Amie waore ‘n ‘imaginaire’ grens of brök te wied gewees.
Vastelaovend same.